У варшаўскім Цэнтры беларускай салідарнасці пры падтрымцы амбасады Канады 2 лютага прайшла прэс-канферэнцыя на тэму парушэння правоў чалавека ў Беларусі. «BELPOL» агучыў аналіз крымінальных справаў за 2023 год, «Вясна» і «Рабочы рух» расказалі пра характар рэпрэсія, паведамляе Белсат.
Праваабаронца «Вясны» Яна Галаган адзначыла, што рэпрэсіі супраць беларусаў, якія пратэставалі яшчэ ў 2020 годзе, працягваюцца дасюль.
«Нельга лічыць, што сітуацыя ў краіне стабілізавалася, – сказала яна. – Цяпер, перад выбарамі ў 2024-2025 гадах рэпрэсіі выйшлі на новы ўзровень. Рэжым знішчае салідарнасць беларусаў, запужвае людзей унутры краіны, а таксама рознымі спосабамі цісне на тых, хто быў вымушаны збегчы ад пераследу ў іншыя краіны. У беларусаў унутры краіны не засталося ніякіх сродкаў абароны сваіх правоў – ні прававых, ні іншых».
