Па-ранейшаму ў Польшчы не вырашана праблема навучання беларускіх дзяцей на беларускай мове ў дзяржаўных школах. Іншая справа атрыманне вышэйшай адукацыі. Тут удалося стварыць некалькі навучальных ініцыятываў і асобныя дысцыпліны выкладаюцца па-беларуску. Але існуе шмат іншых праблем, якія будуць абмяркоўвацца на адмысловай канферэнцыі.
Кажа доктар навук, прафесар, каардынатар Беларускай акадэміі Святлана Куль-Сяльверстава:
-На красавік мы рыхтуем вялікую канферэнцыю па заказе Міністэрства адукаці Польшчы. Гэта робіць наш асноўны партнёр – Вышэйшая школа кадраў менеджменту ў Коніне. Канферэнцыя пройдзе 10 – 11 красавіка, там акурат вялікая доля пытанняў і праблем, якія будуць разгледжаныя, пра перспектывы адукацыі для беларусаў у Польшчы.
Святлана Куль-Сяльверстава працавала на кафедры турызму і рэкрэацыі Беластоцкага політэхнічнага ўніверсітэта. З 2021 года яна ініцыятарка стварэння і адная з арганізатараў Беларускай акадэміі ў Польшчы.
Беларускае Радыё Рацыя
