У Беластоку пры помніку ксяндзу Ежы Папялушку прайшла штомесячная акцыя салідарнасці з журналістам і актывістам Саюза палякаў на Беларусі – Анджэем Пачобутам. Традыцыйна сярод іншага падчас акцыі ўзгадалі і ўсіх палітычных вязняў у Беларусі.
Пра навіны ад Анджэя Пачобута падзяліўся віцэ-старшыня Саюза Марэк Занеўскі:
– Сітуацыя з Анджэем, на жаль, застаецца такой самай – стабільна дрэннай надалей. Ён знаходзіцца ў Наваполацку ў ПКТ. Не вельмі многа інфармацыі мы пра яго маем, ведаем толькі, што не сядзіць у ШІЗа цяпер, з такога пазітыўнага. А так поўная інфармацыйная блакада.
Кажа ўдзельніца акцыі:
– Штомесяц мы выходзім у гэтае месца, каб выказаць сваю салідарнасць з тымі беларусамі, якія сёння знаходзяцца за кратамі. Хвіліны складаюцца ў гадзіны, гадзіны – у дні, дні – у тыдні, месяцы і гады зняволення. Кожны дзень, які людзі адбываюць за кратамі, аддае адбітак на іх здароўе і на іх псіхалагічны стан.
Па словах старшыні падляшскага аддзела таварыства Wspolnota Polska Ганны Кетліньскай, толькі ў гэтым годзе ў Беласток прыбылі больш 200 былых палітвязняў з Беларусі, што выйшлі з-пад арыштаў і патрабуюць зараз дапамогі ва ўладкаванні жыцця.
Цалкам матэрыял слухайце ў далучаным файле:
Юрась Дзяшук, Беларускае Радыё Рацыя
