“Акопы ўжо не знікнуць з мапаў” — падкрэсліў бургамістр Сухаволі ў роднай вёсцы Ежы Папялушкі. Тут прайшла прэс-канферэнцыя, прысвечаная Музею блаславёнага ксяндза Ежы Папялушкі, які мае быць адкрытым ужо праз два гады.
На прэзентацыі
У час сустрэчы быў таксама перададзены зямельны пляц пад будаўніцтва музея. Бургамістр Сухаволі Міхал Матыскель падкрэсліў, што гэта вельмі важная інвестыцыя, як для лакальнай супольнасці, так і для жыхароў усяго краю.
– Ксёндз Ежы, капелан “Салідарнасці”, нязломны, тут ён нарадзіўся і цяпер вяртаецца да Акопаў. Рады гэтаму, бо для нас гэта таксама імпульс для развіцця. Чарговыя групы пілігрымаў і турыстаў сюды паедуць. Сухаволя і Акопы ўжо не знікнуць з мапы, дзякуючы ксяндзу Ежы.
Сучасны будынак музея будзе ўпісвацца ў краявід дрэў, якія тут растуць, ствараючы мост паміж мінулай і цяперашняй місіяй Ежы Папялушкі, падкрэсліў аўтар праекту, архітэктар Міраслаў Нізё:
– Гэты аб’ект сваёй сучаснай формай спрабуе гарманізавацца з кантэкстам мінулага. Быць адмысловай архітэктурнай сімволікай. Ён знаходзіцца ў зручным месцы. Маю надзею, будзе прыцягваць увагу. Зроблена так, што аб’ект добра ўпісаны ў ландшафт, не будзе вылучацца, а будзе старацца дапасавацца да мясцовасці.
У музеі будуць прадстаўлены жыццё і пастырская дзейнасць айца Папялушкі, а таксама можна будзе даведацца пра змаганне за такія вартасці, як чалавечая годнасць і пашана да людзей працы. Адкрыццё музея запланавана на 2027 год.
Цалкам матэрыял:
Уля Шмулько-Лейзорко, Беларускае Радыё Рацыя
