Учора, 30 сакавіка, у Бебжанскім Нацыянальным парку на Падляшшы ўспыхнуў пажар. Агонь ахапіў агулам плошчу каля 90 гектараў на мяжы Аўгустоўскага і Сакольскага паветаў Падляшскага ваяводства, каля населеных пунктаў Красныбор і Каменная новая.
Фота: wydarzenia.interia.pl
З гэтай нагоды у камандаванні Ваяводскай Дзяржаўнай пажарнай службы ў Беластоку адбылася сустрэча з удзелам ваяводы Яцэка Бжазоўскага. Пра гэта гаворыцца ў прэс-рэлізе Ваяводскай управы.
Па даных на позні вечар нядзелі, на месцы працавалі больш за 30 пажарных брыгад, занятых тушэннем пажару. Са стыхіяй змагаюцца ажно 120 пажарных і добраахвотнікаў пры падтрымцы супрацоўнікаў парку.
Для дакладнага вызначэння месцазнаходжання агню выкарыстоўваюцца беспілотнікі, а таксама верталёт і самалёт пажаратушэння.
Па даных пажарных, згарэла каля 89 га, у асноўным травы і трыснягу. Пажар быў лакалізаваны, і цяпер працягваецца яго тушэнне. Месцы, ахопленыя ўзгараннем, знаходзіліся пад наглядам усю ноч, каб прадухіліць распаўсюджванне агню.
