У Беластоку адбылося ўрачыстае закрыццё праекта па ахове магіл беларускіх дзеячаў культуры і гісторыі. Дзякуючы падтрымцы неабыякавых беларусаў з Падляшша і Беларусі, ініцыятыве ўдалося сабраць 8444,27 злотых.
Прадстаўніца Хаба «Новая Зямля», партнёра збору, Надзея Салаўева ўручыла падарункі спонсарам:
– Я вельмі рада, што ўсё атрымалася, што паспяхова закрыўся гэты збор. Не ўсе зборы, якія адкрывае «Гронка», заканчваюцца паспяхова. Напэўна была добрая піяр-кампанія. Дзякуй нам усім.
Кажа ўдзельніца праекта, прадстаўніца ТБМ у Беластоку Вольга Казановіч:
– Гэта добра, што ў гэтыя дні ўпарадкаваныя могілкі. Закрылі збор, аплацілі ўтрыманне магіл на 20 гадоў. Гэта вельмі добра. Нашая маленькая справа зроблена супольна.
У межах мерапрыемства ўсе спонсары атрымалі і плакаты ад фонду «Тутака» як знак падзякі за ўдзел у праекце. Пасля ўрачыстага ўручэння падарункаў удзельнікі накіраваліся на экскурсію па Усіхсвяцкіх могілках, каб асабіста ўбачыць вынікі работы і аддаць пашану памяці беларускіх дзеячаў.
Сродкі для рэалізацыі праекта былі сабраныя пры падтрымцы краўдфандынгавай платформы Gronka, якая дапамагае беларускім ініцыятывам ажыццяўляць важныя грамадскія праекты.
Цалкам матэрыял:
Беларускае Радыё Рацыя
