Дзясяткі людзей прынялі ўдзел у святкаванні юбілею Гайнаўскага беларускага ліцэя. У будынку школы прайшлі ўрачыстасці, прымеркаваныя да 75-годдзя ўстановы.
У святкаванні прынялі ўдзел выпускнікі і вучні школы, а таксама прадстаўнікі беларускіх інстытуцыяў культуры, палітыкі ды духавенства. Ліцэй будзе існаваць, падкрэсліў шматгадовы дырэктар і настаўнік, Яўген Сачко:
-З вялікаю прыемнасцю прыходжу ў школу, бо ёсць надалей тут цудоўная атмасфера, якая тут заўсёды была. Ёсць цудоўныя настаўнікі, якія тут заўсёды былі. Таму думаю, што беларускі ліцэй быў, ёсць і будзе існаваць. У якой форме – гэта невядома, але ён будзе. Ці больш, ці менш будуць вывучаць беларускую мову, але будзе напэўна такая група, якая гэты корань ліцэя падтрымае.
75 гадоў ліцэю, 4 з іх – гэта таксама мае. Мой унёсак у гісторыю гэтай школы і мой асабісты досвед. Але сёння самае прыгожае, як выступае моладзь. Самае важнае для школы – гэта што ёсць моладзь, якая хоча вучыцца беларускай мове, якая хоча браць удзел у розных мерапрыемствах. Гэта проста для мяне вялікае шчасце, што тое, што рабілі настаўнікі раней, робяць і цяпер.
Гайнаўскі беларускі ліцэй сваё 75-годдзе будзе святкаваць два дні. Пры нагодзе адбудзецца таксама пяты з’езд выпускнікоў школы.
* * *
28 верасня ў Гайнаўцы пачаўся першы дзень з’езду выпускнікоў беларускага ліцэя, які адначасна святкуе 75 гадоў існавання і працы. На з’езд з’ехаліся многія вядомыя беларусы Падляшша, як госці прыбылі прадстаўнікі Кабінету Святланы Ціханоўскай і кіраўнік НАУ Павел Латушка.
Святкаванні будуць доўжыцца два дні.
Намеснік кіраўніцы Кабінета Павел Латушка і прадстаўніца па нацыянальным адраджэнні Кабінета Аліна Коўшык наведалі Беларускі ліцэй у Гайнаўцы з нагоды 75-годдзя навучальнай установы. У гэтыя дні тут адбываецца V з’езд выпускнікоў ліцэю. Прадстаўнікі Кабінета звярнуліся да прысутных з прамовамі.
Павел Латушка сказаў: «Вы для нас, беларусаў з Беларусі, з’яўляецеся зоркай на шляху беларускасці, якая для мяне як міністра культуры і амбасадара была заўсёды прыкладам стаўлення да захавання нацыянальных каранёў, роднай мовы, культуры, веры. Дзякуй вам за тое, што вы робіце для беларускасці тут, у Польшчы».
Павел Латушка і Аліна Коўшык ўручылі дырэктару Беларускага ліцэя ў Гайнаўцы Ігару Лукашуку медаль «Гонар і годнасць» за ўнёсак у захаванне і папулярызацыю беларускай мовы. У бібліятэку ліцэя былі перададзеныя кнігі сучасных беларускіх аўтараў.
Беларускае Радыё Рацыя
