Пяць гадоў таму мэр Гданьска Павел Адамовіч загінуў у выніку нападу і нажавога ранення. Лаўка-помнік усталяваная на беразе Матлавы, насупраць славутага гданьскага жураўля (пад’ёмны кран у порце на беразе ракі).
Падчас кароткай цырымоніі дачка забітага мэра Гданьска распавяла, што яе бацька заўсёды імкнуўся ператварыць гэтую частку горада ў месца, якое служыць людзям. Антаніна Адамовіч падкрэсліла, што гэта найлепшае месца для помніка-лаўкі Паўлу Адамовічу.
Павел Адамовіч быў паранены нажом 13 студзеня 2019 года падчас фіналу Вялікага аркестра каляднай дабрачыннасці ў Гданьску. Ён памёр у шпіталі 14 студзеня, а 19 студзеня адбылося яго пахаванне ў базіліцы Святой Марыі. Забойца Стэфан Вільмонт асуджаны да пажыццёвага зняволення ў сакавіку мінулага года.
Адкрыццё лаўкі Паўла Адамовіча адбылося ў рамках адзначэння пятай гадавіны смерці мэра Гданьска.
Крыніца: Польскае радыё
Фота: PAP/Andrzej Jackowski
