У Варшаве, на перасячэнні вуліцы Górczewskiej i алеі Prymasa Tysiąclecia, адкрылі адноўлены мурал, які прысвечаны беларускім палітвязням. Раней на гэтым месцы была выява праваабаронца Алеся Бяляцкага з паведамленнем пра яго вызваленне пасля першай адседкі. Зараз тут 4 партрэты беларускіх герояў за кратамі з іх цытатамі.
На адкрыцці мурала прысутнічала Святлана Ціханоўская. Яна лічыць, што гэты мурал важны як для беларусаў, так і для палякаў, гаворыць Святлана Ціханоўская:
– Тут нашыя выбітныя героі, якія зараз знаходзяцца за кратамі за тое, што яны змагаліся за дэмакратыю ў Беларусі, за правы. Нобелеўскі лаўрэат Алесь Бяляцкі, наш беларуска-польскі герой Анджэй Пачобут, Марфа Рабкова, якая змагалася за правы чалавека.
На адкрыцці мурала прысутнічаў мастак Дарыюш Пачкоўскі са сваёй памочніцай Магдаленай і валантэркамі з Amnesty International Polska. Для таго, каб завяршыць працу да адкрыцця мурала, ім прыйшлося добра папрацаваць, кажа Дарыюш Пачкоўскі:
– Валанцёры “Amnesty International” дапамаглі нам падрыхтаваць паверхню, малявалі. Ноччу з Магдаленай за трэцяй раніцы малявалі партрэты і яшчэ на наступны дзень.
Цалкам слухайце ў далучаным гукавым файле:
Святлана Ціханоўская падзякавала Польшчы за іх моцную пазіцыю, за дапамогу беларусам у выгнанні, а надпісы на мурале дапамагаюць палякам зразумець, што адбываецца ў Беларусі.
Беларускае Радыё Рацыя
