Як стала вядома “Свабодзе”, ёсць папярэдняя дамоўленасць з муніцыпалітэтам Вільні аб адкрыцці яшчэ аднаго першага класа з беларускай мовай навучання. Бо адзіная беларускамоўная гімназія імя Скарыны перапоўненая: на 1 верасня 2023 году там было 408 вучняў.
Днямі бацькі беларускіх школьнікаў Вільні сустрэліся з прадстаўнікамі Офісу Святланы Ціханоўскай. Прадстаўнікі Офісу маюць намер наведаць Скарынаўскую гімназію, а таксама сустрэцца з віленскімі гарадскімі ўладамі.
Галоўная задача — гэта пацверджанне ў Літве дыпломаў беларускіх настаўнікаў, якія могуць выкладаць прадметы па-беларуску. Акрамя таго, паводле літоўскіх законаў, усе педагогі павінны ведаць літоўскую мову.
Ініцыятыўная група бацькоў дамагаецца адкрыцця прынамсі трох пачатковых класаў па-беларуску.
