Актывісты Вольга і Зміцер Фурманавы адкрыюць цягам бліжэйшага тыдня ў Вільні краму беларускіх рамеснікаў і творчую прастору Kropka.
Зміцер Фурманаў, гарадзенскі актывіст, які быў затрыманы ў траўні 2020 году падчас акцыі, калі ў Гародні затрымлівалі Сяргея Ціханоўскага. Зміцер быў асуджаны і выйшаў на волю ў кастрычніку 2021 году і адразу быў вымушаны з-за пераследу з’ехаць за мяжу.
Пра тое, што можна будзе пабачыць у гэтым месцы, распавядае Вольга Фурманава:
-Мы збіраемся прэзентаваць вырабы майстроў-рамеснікаў. А ў другім памяшканні збіраемся рабіць імпрэзы, сустрэчы, прагляды фільмаў, усякае рознае, на што будзе запыт.
РР: З якімі майстрамі вы маеце кантакт?
-У асноўным гэта беларусы, якія з’ехалі з Беларусі і займаюцца сваімі рамёствамі.
Вольга распавядае, адкуль узялася ідэя стварэння гэтай прасторы:
-Апошнія 10 гадоў мая праца была звязаная з продажам і тут, у Вільні, я таксама працавала ў краме. Я пачала задумвацца, што рабіць далей, як жыць. Мне захацелася неяк развівацца. І аднойчы я сказала мужу, што хачу сваю краму.
Крама адчыніцца ў самым цэнтры Вільні недалёка каля Ратушы, і сярод майстроў, вырабы якіх будуць прадстаўлены ў гэтай крамцы, будуць такія вядомыя гарадзенцы, як Сяргей Верамеенка і Вадзім Саранчукоў.
Беларускае Радыё Рацыя
