Пра гэта піша нямецкае Bild. Ваенны аглядальнік Юльян Рэпке са спасылкай на словы афіцэра УСУ піша, што адваяванне акупаваных тэрыторый не з’яўляецца цяпер асноўнай мэтай украінскай арміі – прыярытэтам становіцца і не абарона цяперашняй лініі фронту, а знішчэнне як мага большай колькасці расейскіх вайскоўцаў з мінімальнай колькасцю страт ва ўкраінскай арміі.
Іншы вайсковец пацвердзіў: «Цяпер ужо няма ціску, таму мы проста імкнемся да максімальных страт суперніка. Пазіцыі не маюць значэння, галоўнае, каб большасць украінцаў засталіся жывыя». Пра гэта кажа і былы заходні вайсковец, які ў апошнія гады неаднаразова кансультаваў Украіну: «Вы ствараеце міннае поле і назіраеце, як на ім гіне як мага больш расейцаў і знішчаюцца іхнія танкі. А калі яны пройдуць, вы адступіце на кіламетр і дазволіце расейцам заехаць на наступнае міннае поле, якое было тым часам устаноўлена».
За гэтай стратэгіяй, магчыма, стаіць «надзея на дасягненне кульмінацыйнай кропкі, у якой расейскі наступ абрынецца». Утрыманне ці нават вяртанне тэрыторый, на думку экспертаў, зноў стане прыярытэтам толькі калі расейскія сілы альбо страцяць дастаткова людзей і тэхнікі, альбо на фронт прыбудзе «зброя, якая змяняе правілы гульні», якая дазволіць Украіне ўзяць ініцыятыву ў свае рукі.
