У Расеі па фактах абвальвання мастоў у Бранскай і Курскай абласцях распачатыя крымінальныя справы, перадае Інтэрфакс словы афіцыйнага прадстаўніка Следчага камітэта Святланы Пятрэнкі.
Яна не ўдакладніла, па якім артыкуле Крымінальнага кодэксу РФ распачатыя справы, аднак яна заявіла, што масты паваліліся ў выніку падрываў.
Паводле яе, аўтамабільны мост у Бранскай вобласці абваліўся каля 23.00 31 траўня. Яго абломкі ўпалі на пасажырскі цягнік, які праходзіў пад ім.
Каля 3 гадзін ночы таксама адбыўся падрыў чыгуначнга моста ў Курскай вобласці, ад чаго чыгуначны састаў, які ехаў па ім, зваліўся на аўтамабільную дарогу. Адзін з машыністаў атрымаў траўмы ног, усю лакаматыўную брыгаду даставілі ў бальніцу.
Паводле апошніх звестак, у выніку абрушэння моста на чыгуначныя пуці ў Бранскай вобласці загінулі сем чалавек, у бальніцах знаходзяцца 47 чалавек, у тым ліку трое дзяцей, заявіў кіраўнік Бранскай вобласці Аляксандр Багамаз. «Адбыўся падрыў моста на трасе падчас руху цягніка, дзе было 388 пасажыраў», – сказаў Багамаз у эфіры тэлеканала «Россия-24».
Беларуская чыгунка паведаміла пра змены ў руху цягнікоў у сувязі з абвальваннем аўтамабільнага моста ў Бранскай вобласці. Змены датычацца цягнікоў Анапа — Менск і Менск — Анапа адпаведна.
