У Беластоку 15 студзеня 2026 году адбылася прэзентацыя — адкрыццё адукацыйнага праекта «Універсітэт Залатога веку», скіраванага на людзей ва ўзросце 55+, якія знаходзяцца ў эміграцыі.
Ініцыятыва разлічаная перадусім на грамадзян Беларусі сталага ўзросту, што цяпер жывуць у Польшчы.
Праект прадугледжвае правядзенне адукацыйных, культурных і інтэграцыйных заняткаў, якія маюць на мэце падтрымку сацыяльнай актыўнасці, самаразвіцця і ўзаемадзеяння ў супольнасці беларусаў старэйшага пакалення.
Пра свой удзел у «Універсітэце Залатога веку» распавяла беларуска сталага ўзросту:
– Я ў вымушанай эміграцыі. Але жыццё працягваецца, тут трэба далей жыць. Дзякуй вялікі арганізатарам, што аб’ядноўваюць беларускіх пенсіянераў, бо гэта вельмі цяжка ў такія гады вось так быць у эміграцыі. Гэта вельмі цяжка. І калі разам збіраемся, вось пенсіянеры, мы падтрымліваем адно аднаго.
Партнёрамі праекта ў Беластоку стала фундацыя “Okno na Wshod”. Кажа яе кіраўнік Павел Міцкевіч:
– Са студзеня адкрылася месца пад назвай “Дом суседства”, і ў гэтай прасторы мы будзем арганізоўваць розныя мерапрыемствы. Адным з накірункаў дзейнасці з’яўляецца адукацыя, таму “Універсітэт Залатога веку”, адукацыйная дзейнасць для пажылых людзей з Беларусі, якія жывуць у Беластоку. Для нас сумяшчальная з гэтым месцам, бо яно будзе служыць не толькі адукацыі, але і інтэграцыі з Беларуссю. Месца, дзе могуць сустракацца сталыя людзі з Беларусі.
Заняткі беластоцкага «Універсітэта Залатога веку» будуць адбывацца ў памяшканнях фундацыі “Okno na Wshod” амаль у самым цэнтры Беластока на вуліцы Сянкевіча.
Цалкам матэрыял:
Беларускае Радыё Рацыя
