Украінскія вайскоўцы ў Курскай вобласці Расеі захапілі ў палон двух вайскоўцаў з Паўночнай Карэі, паведаміў 11 студзеня прэзідэнт Украіны Уладзімір Зяленскі.
«Гэта два вайскоўцы, якія, хоць і былі параненыя, але выжылі. Іх даставілі ў Кіеў», — расказаў прэзідэнт Украіны і падкрэсліў, што цяпер палонным аказваецца неабходная медыцынская дапамога.
Зяленскі дадаў, што захапіць вайскоўцаў з КНДР удалося «дзякуючы вайскоўцам тактычнай групы № 84 Сіл спецыяльных аперацый Узброеных сіл Украіны і нашым воінам-дэсантнікам».
Прэзідэнт Украіны таксама адзначыў, што «даручыў СБУ забяспечыць журналістам доступ да гэтых палонных». «Свет павінен ведаць, што адбываецца», — дадаў ён.
Паводле інфармацыі Сіл спецыяльных аперацый Украіны, вайскоўцаў КНДР узялі ў палон 9 студзеня падчас баёў у Курскай вобласці Расеі.
