Журналісты і супрацоўнікі гуманітарных арганізацый змогуць наведваць буферную зону на мяжы з Беларуссю. Ім трэба будзе толькі атрымаць пропуск. Пра гэта заявіў кіраўнік міністэрства ўнутраных спраў і адміністрацыі Томаш Семоняк. “Няма ніякіх падстаў адрэзаць мяжу ад СМІ”, — прыводзіць словы Семоняка Польскае агенцтва друку.
Кіраўнік польскага МУС яшчэ раз патлумачыў прычыны з’яўлення буфернай зоны на польска-беларускай мяжы. Яна пачне дзейнічаць, нагадаем, з чацвярга. Са слоў Семоняка, колькасць людзей, якія спрабуюць нелегальна трапіць у Польшчу, а таксама іх агрэсія ўзраслі “радыкальна”.
“Кожны дзень яны кідаюцца камянямі, галінкамі і страляюць з рагатак”, — адзначыў ён. Буферная зона дазволіць забяспечыць бяспеку салдатаў, афіцэраў, памежнікаў і паліцыі. Яна закліканая ўскладніць жыццё кантрабандыстам, якія зарабляюць на перавозцы мігрантаў.
Мяркуецца, што буферная зона будзе расцягнутая ўздоўж мяжы на 60 км. Нагадаем, яе вырашылі аднавіць пасля таго, як польскі салдат атрымаў на мяжы нажавое раненне. Яго ўдарыў мігрант. Пазней малады вайсковец Матэвуш Сітэк памёр у шпіталі.
