Эстонцаў заклікалі ўлічваць рызыкі падчас паездак у Беларусь. Міністэрства замежных спраў папярэдзіла пра магчымыя апытанні і затрыманні, а таксама пра складанасці з атрыманнем консульскай падтрымкі, паведамляе выданне ERR.
Падставай сталі шматлікія выпадкі, калі эстонцаў спынялі на мяжы, апытвалі або затрымлівалі ўнутры краіны.
«Падчас знаходжання там сітуацыя можа стаць надзвычай непрыемнай для нашых грамадзян», — сказала прадстаўнік МЗС Эстоніі Ангела Саар-Рааман.
Паводле яе, у выпадку ўзнікнення праблем у Беларусі атрыманне дапамогі з боку эстонскіх дыпламатаў ускладненае.
«З 20 траўня 2024 года ў эстонскай дыпмісіі ў Беларусі няма дыпламата, і беларускага дыпламата ў Эстоніі таксама няма. У нас таксама няма ў Беларусі консула. Падчас паездкі ў Беларусь варта ўлічваць, што прадастаўленне консульскай дапамогі можа заняць значна больш часу, чым звычайна, або ўвогуле быць немагчымым», — растлумачыла прадстаўніца эстонскага МЗС.
Беларускае Радыё Рацыя
