Паміж Гародняй і Гомелем будзе хадзіць прамы аўтобус. Ён пройдзе праз чатыры вобласці, а яго працягласць складзе амаль 600 кіламетраў. Пра гэта паведаміў тэлеграм-канал старшыні Гомельскага гарвыканкама «Уладзімір Прывалаў. Афіцыйна».
Зараз па раскладзе рэйс будзе адбывацца двойчы на тыдзень: у пятніцу і нядзелю.
З Гародні аўтобус будзе адпраўляцца ў 05.00 раніцы, а назад з Гомеля выязджаць у 18.10. Час у дарозе складзе 7 гадзін 37 хвілін. Колькасць рэйсаў могуць павялічыць пры вялікім попыце. Таксама па дарозе аўтобус будзе рабіць прыпынкі ў Шчучыне, Лідзе і Бабруйску.
Цана білета з Гародні ў Гомель складзе 70 беларускіх рублёў. Варта адзначыць, што ў 1980-х гадах паміж гэтымі гарадамі таксама курсіраваў прамы аўтобус.
