У Клайпедзе з 1 студзеня пачаў дзейнічаць так званы “падушачны падатак”: турысты, якія пражываюць у мясцовых гатэлях і іншых аб’ектах размяшчэння, зараз будуць плаціць па адным еўра за кожную ноч.
Гэты збор накіраваны на развіццё турызму ў горадзе, паведамляе LRT.
Мэр Клайпеды Арвідас Вайткус падкрэсліў, што сабраныя сродкі дапамогуць ажывіць жыццё горада па-за турыстычным сезонам – восенню, зімой і вясной.
“Мы зможам падтрымліваць мерапрыемствы, якія працягнуцца некалькі дзён і прынясуць гораду карысць”, – сказаў мэр.
Аднак абмяркоўвалася, што ў Клайпедзе збор павінен складаць €2, але Рада не прыняла гэтую прапанову. Вайткус сказаў, што ў будучыні магчымае павелічэнне платы.
Чакаецца, што новы падатак прынясе ў бюджэт каля €500 тыс. у год. Ад збору вызвалены дзеці, людзі з абмежаванымі магчымасцямі, а таксама тыя, хто пражывае ў аб’ектах размяшчэння даўжэй за месяц.
