Міністэрства камунікацыі Латвіі даручыла аўтатранспартнай дырэкцыі падрыхтаваць прававое абгрунтаванне намеру не падаўжаць ліцэнзіі на рэгулярныя аўтобусныя перавозкі пасажыраў з Латвіі ў Расею і Беларусь, піша выданне Delfi.
Міністр камунікацыі Латвіі Аціс Швінка патлумачыў рашэнне неабходнасцю ўлічваць рызыкі на межах Еўразвяза, звязаныя з ростам пасажырапатоку ў Расею і Беларусь.
Паводле звестак аўтатранспартнай дырэкцыі, цяпер з Латвіі выконваюцца чатыры аўтобусныя маршруты ў Расею і тры — у Беларусь.
Рэгулярныя перавозкі ў Беларусь выконвае кампанія SIA Lat-lines. Ліцэнзія на рэйсы ў Віцебск дзейнічае да 31 студзеня 2026 года, у Менск — да 26 лютага, у Гомель — да 27 чэрвеня наступнага года.
У аўтатранспартнай дырэкцыі растлумачылі, што для спынення рэгулярных аўтобусных перавозак у Расею і Беларусь неабходны знешні нарматыўны акт. Пры гэтым, калі краіны Балтыі не ўзгодняць сумеснае рашэнне, пасажыры для паездак з Латвіі ў Беларусь будуць карыстацца маршрутамі праз Літву, а таксама мікрааўтобусамі да дзевяці месцаў.
