Урад Латвіі сёння, 27 лютага, прыняў рашэнне прадоўжыць яшчэ на год забарону на ўезд для грамадзян Расеі. Яна будзе дзейнічаць да 4 сакавіка 2025 году.
Першапачаткова забарона была ўведзена ў верасні 2022 года. Умовы забароны не мяняліся. Грамадзяне Расеі не могуць уязджаць у Латвію ў турыстычных і забаўляльных мэтах. Пры гэтым перасекчы мяжу могуць расейцы, якія маюць віды на жыхарства ў Латвіі, Швейцарыі, краінах ЕЗ, доўгатэрміновыя візы краін шэнгенскага пагаднення. Таксама дазволены ўезд чальцам сем’яў грамадзян краін ЕЗ, могуць уязджаць асобы па гуманітарных меркаваннях, работнікі транспартных кампаній пры выкананні перавозак і па некаторых іншых катэгорыях.
