Марыямполе — горад на паўднёвым захадзе Літвы, сёмы па колькасці жыхароў з насельніцтвам каля 37 000 чалавек. Цэнтр літоўскага рэгіёну Сувалкія – адной з чатырох гістарычных абласцей краіны.
Горад месціцца за 50 кіламетраў ад Коўна, каля 140 кіламетраў ад Вільні, непадалёк ад польскай і расейскай мяжы (Калінінградскай вобласці). Назва горада паходзіць ад манахаў-марыянаў, якія пасяліліся ў сярэдзіне XVIII стагоддзя і пабудавалі там кляштар.
Магдэбургскае права горад атрымаў 23 лютага 1792 года, яго дараваў кароль Польшчы і вялікі князь літоўскі Станіслаў Аўгуст Панятоўскі.
Марыямполе – рэгіянальны цэнтр прадпрыемстваў лёгкай прамысловасці, будаўніцтва, транспарту і гандлю. У горадзе працуе Марыямпольскі малочна-кансервавы камбінат, адзіны вытворца малочных кансерваў у краінах Балтыі. Таксама тут знаходзіцца адзін з найбуйнейшых рынкаў патрыманых аўтамабіляў у Еўропе.
Горад адметны і сваімі графіці. Літоўскі мастак і майстар стрыт-арта Рэй Барткус штогод арганізоўвае там сімпозіўмы вулічнага мастацтва “Malonny”.
Сёлета ў Марыямполі на галоўнай плошчы горада ўсталяваная адна з найпрыгажэйшых святочных ялінак Літвы, вакол якой размешчаныя казачныя жывёлы з гірляндаў. А начны святочны Марыямполе прыцягвае начных турыстаў не толькі сваімі каляднымі агнямі, батлейкай, але і невялікімі скульптурамі, у тым ліку катоў, якіх не так і проста знайсці ў цемры начнога горада.
Затое чыгуначны вакзал і аўтавакзал свецяцца яркімі агнямі, праўда, у вячэрні час, пасля 22 00, у Марыямполі зусім нешматлюдна, нават на вакзалах. Гэты горад, як і іншыя літоўскія гарады, засынае рана.
Беларускае Радыё Рацыя
