Аэрапорты ў Жэшуве і Любліне часова прыпынялі выкананне грамадзянскіх авіярэйсаў у сувязі з неабходнасцю забяспечыць свабоду дзеянняў ваеннай авіяцыі. Пра гэта паведаміла Аператыўнае камандаванне Узброеных сіл Польшчы.
Рашэнне было прынята на фоне актывізацыі расейскай далёкай авіяцыі, якая наносіла ўдары па тэрыторыі Украіны. У сувязі з гэтым у паветранай прасторы Польшчы пачалося дзяжурства ваеннай авіяцыі.
У адпаведнасці з дзеючымі працэдурамі Аператыўнае камандаванне задзейнічала неабходныя сілы і сродкі: у паветра былі паднятыя знішчальнікі, а наземныя сістэмы супрацьпаветранай абароны і радыёлакацыйнай выведкі прыведзеныя ў стан павышанай гатоўнасці.
У камандаванні падкрэслілі, што прынятыя меры маюць прэвентыўны характар і накіраваныя на забеспячэнне бяспекі і абарону паветранай прасторы, у першую чаргу ў рэгіёнах, якія мяжуюць з патэнцыйна небяспечнымі зонамі.
«Аператыўнае камандаванне Узброеных сіл Польшчы адсочвае бягучую сітуацыю, а падначаленыя сілы і сродкі знаходзяцца ў стане гатоўнасці да неадкладнага рэагавання», — адзначаецца ў паведамленні.
Пасля завяршэння ваенных мерапрыемстваў аэрапорты ў Жэшуве і Любліне аднавілі авіязносіны. Пра гэта праінфармавала Польскае агенцтва паветранага руху.
