Мангольскія стрэлы, візантыйскія амфары, гузікі французскіх салдат: амаль 600 артэфактаў з Гальшанскага археалагічнага комплексу прадстаўлены на ўнікальнай выставе ў Ашмянскім краязнаўчым музеі, паведамляе БЕЛТА.
Праект, падрыхтаваны Ашмянскім краязнаўчым музеем ім. Ф.К.Багушэвіча сумесна з Інстытутам гісторыі Нацыянальнай акадэміі навук, запрашае гледачоў у падарожжа праз стагоддзі.
Выстава “У пошуках страчанага часам” прадстаўляе амаль 600 артэфактаў – матэрыялаў раскопак Гальшанскага археалагічнага комплексу, які ўключае ў сябе паселішча XI-XVI стагоддзяў, тры іншыя паселішчы і шэраг курганоў. Гэтыя экспанаты дазваляюць усебакова пазнаёміцца з гісторыяй Гальшан і наваколля ад V да ХІХ стагоддзяў.
“Вынікі вывучэння Гальшанскага комплексу сапраўды здзіўляюць: тут знойдзены стрэлы гунаў V стагоддзя, рэчы, якія адносяцца да культуры ўсходнелітоўскіх курганоў, шкляныя бранзалеты і пасавыя накладкі Х-XI стагоддзяў, мангольскія стрэлы сярэдзіны XIII стагоддзя, рэшткі візантыйскай амфары і многае іншае. Завяршае экспазіцыю раздзел, прысвечаны вайне 1812 года: кулі, накладкі на ківер, гузікі французскай і расейскай армій, шрапнэль – усё гэта сведчанні баёў у наваколлях Гальшан”, – распавяла дырэктарка музея Анастасія Навіцкая.
Разам са спецыялістамі ўжо амаль 20 гадоў у раскопках удзельнічаюць навучэнцы Гальшанскай СШ, пры якой адкрыты гісторыка-археалагічны лагер “Кентаўры”.
Выстава працягнецца ў музеі да 15 траўня.
Фота: Ашмянскага раённага турыстычнага інфармацыйнага цэнтра
