На аўтадарозе “Бабруйск – Мазыр – мяжа Украіны”, на ўездзе ў Гомельскую вобласць з боку Бабруйска, пачала функцыянаваць “музычная дарога”.
Гэта сумесны праект РУП “Гомельаўтадар” і Дзяржаўтаінспекцыі, які не мае аналагаў у Беларусі.
“Механізм працы вельмі просты: як толькі кіроўца заехаў на ўчастак спецыяльнай разметкі на паласе руху (у правай каляіне), на якой адмысловым спосабам нанесены папярочныя лініі чырвонага колеру з пластыка халоднага нанясення, ствараецца шумавы эфект у салоне аўтамабіля, які нагадвае мелодыю песні «Маладосць мая, Беларусь» у выкананні гурта «Песняры», – паведамляе Telegram-канал “Сожскі фарпост”.
Асноўная задача новаўвядзення – прадухіленне ДТЗ з-за сну за рулём і з’езда ў кювет праз страту кіравання.
