Нацыянальны парк “Белавежская пушча” пачаў улік зуброў у Беларусі. Ён праводзіцца штогод зімой, калі зубры прыходзяць у месцы падкормак, паведамляе npbp.by.
«Статкі белавежскіх зуброў фармуюцца самі па сабе і існуюць па ўсёй тэрыторыі нацыянальнага парка і яго ахоўнай зоны. У цяперашні час усе зубры падзяляюцца на пяць асноўных груповак: паўночная, паўночна-заходняя, цэнтральная, паўднёвая, паўднёва-заходняя», – патлумачылі ў нацыянальным парку.
Падлік зуброў сёлета вядзецца па слядах, з дапамогай візуальных назіранняў у месцах падкормак (жыровак), пры дапамозе бінокляў і фотаапаратуры. Правядзенне якаснага ўліку зуброў – даволі працаёмкі працэс, які патрабуе шматразовых выездаў да месцаў магчымых лакалізацый дзікіх жывёл.
Вынікі “перапісу” будуць вядомы прыкладна праз тры тыдні.
У мінулым годзе ў Белавежскай пушчы налічылі 730 зуброў, у тым ліку самцоў старэйшых за 3,5 года – 100 асобін, дарослых самак – 374, маладняку 1,5-3,5 гадоў – 153 асобіны, малых – 103 зубраня.
