У Беларускім дзяржаўным музеі народнай архітэктуры і побыту 13 кастрычніка адбудзецца свята «Пакроўскі кірмаш», паведамляе etna.by. Музей пад адкрытым небам размешчаны на паўднёвым захадзе ад Менска, у аграгарадку Азярцо.
У традыцыйным беларускім календары «Пакровы» – межавая дата, якая звязаная з заканчэннем восеньскага цыкла гаспадарчых клопатаў, завяршэннем пары збору ўраджаю.
У грамадскім жыцці ў гэты час пачыналася пара вяселляў, таму пасляпакроўскі перыяд невыпадкова называюць «Вялікай вясельніцай». Сцвярджалася, што «да Пакроваў усё павінна быць звезена з поля, а хлопец з Пакроваў, каб гатовы быў жаніцца».
Удзельнікаў свята чакае:
–Абрад «Сватанне»;
–Кірмаш народных майстроў;
–Майстар-класы;
–Традыцыйныя танцы і гульні.
За дадатковую плату можна наведаць «Беларускую карчму», якая знаходзіцца на тэрыторыі музея, а таксама набыць сувеніры ад народных майстроў.
Музей знаходзіцца ў 4-х км ад МКАД за аўтарынкам «Малінаўка» каля аг. Азярцо.
