З 1 студзеня 2025 года ў пасольствах і генеральных консульствах Тайланда ва ўсім свеце запрацуе сістэма электронных візаў. Гэтыя змены закрануць і беларусаў.
Фота: cars4travel.com
«Пасольства Каралеўства Тайланд ў Маскве аб’яўляе пра завяршэнне практыкі падачы дакументаў на візу па дзейнай сістэме і запуску сістэмы электроннай візы ў Тайланд (e-visa) з афлайн-метадам аплаты», — паведамілі ў пасольстве Тайланда ў Маскве, якое абслугоўвае і грамадзян Беларусі.
Пасольства будзе прымаць заявы на атрыманне візы любога тыпу да 24 снежня 2024 года. Афармленне ж электронных віз запусцяць з 7:00 (па менскім часе) 1 студзеня 2025 года.
Падаць заяву на атрыманне электронных віз могуць грамадзяне, якія пражываюць у Беларусі, Расеі, Узбекістане, Арменіі, Малдове. Гэта можна будзе зрабіць праз партал thaievisa.go.th, тэрмін разгляду заявы — 14 працоўных дзён.
Магчымасць атрымаць візу па прылёце ў Тайланд таксама захаваецца, але толькі для тых, хто плануе знаходжанне не больш за 15 дзён.
