Беларус правёў на лёдзе 16 хвілін 55 секунд, закінуў 2 шайбы, нанёс яшчэ 2 кідкі, здзейсніў 2 перахопы і зарабіў паказчык карыснасці “+2”. У сезоне ў Шаранговіча 41 гульня, 27 (14+13) ачкоў, карыснасць “-9” і 4 хвіліны штрафу.
Ілля Івашка не змог прабіцца ў паўфінал кваліфікацыі Australian Open
Беларус Ілля Івашка саступіў у чвэрцьфінале кваліфікацыі Адкрытага чэмпіянату Аўстраліі, не здолеўшы пераламіць ход матча з Оліверам Кроўфардам з Вялікабрытаніі 3:6, 6:3, 1:6. Працягласць матча склала 1 гадзіну 37 хвілін. Ірына Шымановіч практычна без варыянтаў саступіла прадстаўніцы Сербіі Вользе Данілавіч, якая знаходзіцца значна вышэй у сусветным рэйтынгу. Лік сустрэчы – 2:6, 0:6. Працягласць матча склала 1 гадзіну 12 хвілін.
Эльвіра Грабарэнка (Герман) выйшла ў лідэры сусветнага сезона
Беларуская бягуха Эльвіра Грабарэнка паказала лепшы вынік сезона ў спрынтарскім бегу з бар’ерамі. Яго яна прадэманстравала ў Екацярынбурзе, дзе прайшлі калядныя старты ў рамках Мемарыяла Эдуарда Яламава. Грабарэнка ў папярэднім забегу на 60 метраў з бар’ерамі прабегла дыстанцыю за 8,03 секунды. У фінале яна паказала вынік 8,01. Ніхто з суперніц у гэтым сезоне такіх лічбаў яшчэ не дэманстраваў. Раней МАК дапусціў да Алімпійскіх гульняў беларускіх спартоўцаў у нейтральным статусе. Аднак шанец на паездку ў Парыж у лёгкаатлетаў з беларускім пашпартам мінімальны.
Бага расстаўся з берасцейскім “Дынама”
Як паведамляе прэс-служба «Дынама-Брэст», паўабаронца Зміцер Бага і клуб спынілі супрацоўніцтва па ўзаемным рашэнні. Бага выступаў за каманду з пачатку 2023 года. Ён правёў у складзе берасцейцаў 23 матчы, у якіх забіў 2 мячы і аддаў 2 галявыя перадачы. Паведамлялася, што раней каманду пакінулі Седрык Куадэ, Уладзімір Шчэрба, Яўген Юдчыц, Аляксандр Пазняк, Арцём Япрынцаў, Аляксандр Булычоў, Арцём Літвякоў і Дзмітрый Зіновіч. 6 студзеня берасцейскае “Дынама” ўзначаліў Аляксандр Бразевіч.
Гулец “Зеніта-2” адмовіўся пераходзіць у БАТЭ
20-гадовы паўабаронца “Зеніта-2”, які выступае ў 4-м расейскім дывізіёне Уладзіслаў Саўсь не стаў пераходзіць у барысаўскі БАТЭ, хаця і меў такую прапанову развіцця кар’еры. Саўсь — выхаванец акадэміі “Майстар Сатурн”, а з 2021 года знаходзіцца ў структуры “Зеніта”. На рахунку гульца шэсць галоў і 12 выніковых перадач у 46 матчах за “Зеніт-2”.
У Германіі будзе ўсталяваны рэкорд па наведвальнасці гандбольных матчаў
На гандбольных арэнах Германіі стартуе 16 чэмпіянат Еўропы сярод мужчынскіх каманд. У Дзюсельдорфе ў матчы адкрыцця сустрэнуцца гандбалісты Францыі і Паўночнай Македоніі. У другім паядынку папярэдняй групы А гаспадар турніру зборная Германіі згуляе са швейцарцамі. Абедзве сустрэчы пройдуць на футбольнай Merkur Spiele-Arena, трыбуны якой умяшчаюць больш за 53 тысячы гледачоў. Усе квіткі на гэтыя матчы даўно прададзены, і яны стануць самымі наведвальнымі ў гісторыі сусветнага гандбола.
Беларускае Радыё Рацыя
