У Беластоку падвялі вынікі двух конкурсаў, якія зладзіла Ваяводская управа для падтрымкі ініцыятыў у сферы экалогіі, абароны жывёл і развіцця пчалярства на Падляшшчы.
Кажа Маршалак Падляшскага ваяводства Артур Касіцкі:
– Віншую за складзеныя заявы, дзякую за ўсе дзеянні, якія робяцца ў гэтай сферы. Яны вельмі розныя. З нашага боку такое рашэнне, каб фактычна дафінансаваць тыя, якія выканалі фармальныя вымаганні, Карыстаючы з таго, што хутка будуць святы, хацеў бы зычыць вам вясёлых і добрых свят. Памятайце, што мы жывем у найпрыгажэйшым рэгіёне на свеце.
Прадстаўніца Кола вясковых гаспадынь Лапічах «Лапічанкі»Ева Вільчыньска падкрэсліла, што такая дапамога ваяводства важная для дзейнасці ва ўмовах памежнага крызісу Польшчы і Беларусі:
– Жыву ў Лапічах, гэта вельмі прыгожае месца пры самай мяжы з Беларуссю. Займаемся прыродай і не хочам, каб тут было інтэнсіўнай сельскай гаспадаркі. Тут значна менш турыстаў і гасцей, нібы пра Падляшша ўсе забыліся.
Датацыі атрымалі ініцыятывы з Беластока і дзевяці паветаў, у тым ліку: Беластоцкага, Сямятыцкага і Сакольскага. Агульная сума падтрымкі склала 300 тысяч злотых.
Беларускае Радыё Рацыя
