Больш за сотню грамадскіх актывістаў выйшла ў грузінскім Батумі на акцыю да Дня Волі. Акцыя адбылася ўвечары 24 сакавіка і падчас яе адбылося шэсце ды мітынг, а таксама кірмаш на батумскай Плошчы Еўропы.
Пра сваё бачанне такіх акцый, кажа грамадскі актывіст і паэт Стась Карпаў:
– Я спадзяюся, што калі мы нарэшце атрымаем шанец атрымаць краіну ў сваё распараджэнне, гэтым павінны займацца беларусы, а не той, хто называе сябе аматарам вёсак і Савецкага Саюза. Беларусы хоць раз у жыцці павінны атрымаць шанец. Я думаю, што менавіта з такіх сустрэч дыяспары, з такіх сустрэч людзей абсалютна аднолькавых поглядаў, беларускамоўных найперш натуральна, выпрацуецца тое, што будзе карысным, калі мы вернемся на Радзіму.
Ён упэўнены, што беларусам за мяжой лягчэй захоўваць беларускую ідэнтычнасць:
– Верагодна, як гэта не дзіўна, зараз за мяжой захоўваць беларускую ідэнтычнасць прасцей, чым тым, хто застаецца зараз у Беларусі. Там перад людзьмі стаіць задача выжыць, самазахавацца. Тут можам зрабіць для сябе штосьці яшчэ. Мы можам стаць у большай ступені беларусамі, чым гэта магчыма ў Беларусі. Я спадзяюся, што мы ўсе вернемся, больш радыкальнымі, больш беларускамоўнымі, болей упёртымі, болей бескампраміснымі.
Падчас акцыі Стась Карпаў пасля прамовы прачытаў свой верш. Таксама гучалі вершы Караткевіча. А напрыканцы акцыі пад гукі песні Змітра Вайцюшкевіча “Наш Сцяг”, утварылі нацыянальны сцяг з белых і чырвоных ліхтарыкаў.
Беларускае Радыё Рацыя
