Літва заклікае Еўракамісію да больш строгіх санкцый супраць імпарту прадуктаў харчавання з Беларусі і Расеі на рынак ЕЗ. Пра гэта на пасяджэнні Савета міністраў сельскай гаспадаркі і рыбалоўства ЕЗ заклікаў намеснік міністра сельскай гаспадаркі Літвы Вітаўтас Абукаўскас, піша DELFI.
Ён падкрэсліў, што Літва ўжо ўвяла больш жорсткі кантроль за пастаўкамі збожжа з Расеі ды іншых краін высокай рызыкі. Ён прывітаў прапанову Еўракамісіі падвысіць пошліны на збожжа, насенне алейных культур і прадуктаў з іх, якія імпартуюцца з Расеі і Беларусі. Пры гэтым прадстаўнік Літвы назваў такія меры недастатковымі.
Нагадаем, 20 сакавіка міністры сельскай гаспадаркі Літвы, Латвіі, Эстоніі, Польшчы і Чэхіі прапанавалі Еўракамісіі забараніць імпарт збожжа з Беларусі і Расеі ў Еўразвяз. Яны заявілі, што даходы ад экспарту збожжа ў ЕЗ Расея выкарыстоўвае для фінансавання вайны з Украінай.
