Гарадзенцы патрабуюць патлумачыць, куды знікла шыльда ў гонар Касцюшкі.
Драўляная шыльда на сцяне Новага замка была ўсталяваная ў 1994 годзе, да 200-годдзя паўстання пад кіраўніцтвам Тадэвуша Касцюшкі. У верасні 1794 года ў замку працавала Паўстанцкая парадкавая камісія, у якой браў удзел і сам Касцюшка.
Памяць пра Касцюшку здаўна шануецца і захоўваецца жыхарамі Гародні, адзначылі аўтары петыцыі. Вуліца Касцюшкі існуе ў горадзе каля 100 гадоў, а ў касцёле Францыска Ксаверыя размешчаныя дзве памятныя дошкі.
“Мы лічым, што дэмантаж дошкі негатыўна ўплывае на турыстычны патэнцыял Гародні, абядняе нашую гісторыю, ідзе ў разрэз з прынятымі канцэпцыямі развіцця турызму і гасціннасці Беларусі”, — напісалі аўтары звароту. Подпісы збіраюць да 8 траўня.
Беларускае Радыё Рацыя