Палітвязень Мікалай Аўтуховіч не атрымаў некаторыя прадукты, якія яму дасылалі сваякі і знаёмыя ў турму.
«Бабулі прыйшла пасылка з турмы, пра якую тата папярэджваў. У ёй тое са спісу, што ўжо пратэрмінаванае — тушонка, крупы… Чаму, невядома. Таксама вярнулі чырвоны перац «Чылі», які тата прасіў даслаць, але яму адказалі, што «не дазволена», — паведаміла сваячка Аўтуховіча, якая жыве ў Польшчы.
Паводле Аўтуховіча, у спісе забароненых прадуктаў чырвонага перцу няма, між тым прычыну забароны яму не назвалі.
Мікалай Аўтуховіч асуджаны да 25 год зняволення паводле дзевяці артыкулаў Крымінальнага кодэкса, сярод якіх стварэнне злачыннай групоўкі і акт тэрарызму. Ні па водным з іх Аўтуховіч віны не прызнаў.
Трымаюць палітвязня ў адзіночцы ў гарадзенскай турме.
Беларускае Радыё Рацыя