«Шасталы і Стрыкі. Мой першы свет» («Szastały i Stryki. Mój pierwszy świat”) – такую назву мае другая па ліку кніжка Івоны Зінкевіч. Прэзентацыя адбылася ў Бельску-Падляшскім.
Па прафесіі ляснік, па зацікаўленні краязнаўца і даследчык мясцовай гісторы. Аўтарка ад некалькіх гадоў вядзе Інтэрнэт-старонку «Шасталы, гістрыя і людзі», на якой змяшчае звесткі, успаміны і фотаздымкі, звязаныя з яе роднай вёскай.
– Так направду можна сказаць, што два гады, гэта была праца над кніжкай. Кніжка не толькі пра людзей (жыхароў з вёсак Шасталы і Стрыкі), але і пра прыроду, пра здарэнні. Гэтае ўсё проста ёсць разам спалучана. Гэта не ёсць манаграфія, але штось, што на маю думку спадабаецца шматлікім чытачам. Не толькі людзі з Шасталаў ці Стрыкоў знойдуць тут штосці цікавага для сябе.
Кніжка « Шасталы і Стрыкі. Мой першы свет» з’яўляецца першай у выдавецкай серыі «Малыя Бацькаўшчыны беларусаў Падляшша» аб’яднання «Музей Малой Бацькаўшчыны» ў Студзіводах Дарафея Фёніка.
– Серыю мы назвалі «Малыя Бацькаўшчыны Падляшскіх беларусаў». У гэтай серыі будуць выдавацца кніжкі пра паасобныя мясцовасці. Вырашылі, што ствараем новую серыю з іншым графічным афармленнем. Вяртаемся да натуры. Да палатна, да ціснення, даўняга спосабу друкарскага.
Чарговая сустрэча з Івонай Зінкевіч і прэзентацыя яе кніжкі чакаецца неўзабаве ў Беластоку.
Анна Шайкоўская, Беларускае Радыё Рацыя, Беласток