Заўтра, 1 сакавіка ў маскоўскім ране Мар’іна пройдзе адпяванне загінулага ў зняволенні расейскага апазіцыянера Аляксея Навальнага. Запланавана, што пахаваюць яго ў той жа дзень на Барысаўскіх могілках. Між тым, прэс-сакратарка палітыка Кіра Ярмыш паведамляе, што для развітання з Навальным улады не далі арандаваць адпаведную залю, а цяпер немагчыма знайсці катафалк для перавозкі цела ў царкву. Чым патлумачыць такія перашкоды?
Каментуе расейскі гісторык і блогер Аляксандар Штэфанаў.
– Развітанне будзе даволі масавым, гэта будзе адна з самых масавых палітычных акцыяў пасьля пачатку вайны. Вядома ёсць нюаны звязаныя з тым, што яна пройдзе ў будны дзень, у абед, таму людзей будзе менш, чым магло б быць, калі б яна прайшла ў суботу, але ўсё роўна гэта будзе важна. На развітанне з Аляксеем Навальным прыйдуць тысячы людзей, якія прыйдуць аддаць памяць найбуйнейшаму апазіцыйнаму палітыку ў краіне.
Штэфанаў заўважае, што Навальны пайшоў на неверагоднае самаахвяраванне й ягоны скон – адна з найважнейшых падзей у палітычнай гісторыі Расеі XXI ст.
Беларускае Радыё Рацыя
