«Актуальнасць ідэалаў 25 сакавіка» – круглы стол Рады БНР на гэтую тэму з удзелам прадстаўнікоў беларускіх ініцыятываў і ўладаў Літвы прайшоў у Вільні на Дзень Волі.
Вядучай імпрэзы была сакратарка Рады БНР Паліна Прысмакова. Круглы стол пачаўся са зварота да прысутных і віншавання з Днём Волі старшыні Рады БНР Івонкі Сурвілы.
Падчас імпрэзы выступіў і прадстаўнік беларускага бізнесу, віцэ-прэзідэнт АВВА Серж Наўродскі:
— Мы аб’ядноўваем беларускі бізнес, які пераехаў з Беларусі ў іншыя краіны. У нас каля 120 сябраў — не людзей, а кампаніяў. Мы аб’ядноўваемся не проста тым, што мы бізнес, а вартасцямі: перадусім беларускасць, дэмакратычнасць, свабода. Таму ўсе ідэалы, што ўзгаданыя ва ўстаўной грамаце Рады нам блізкія.
На круглым стале прысутнічалі літоўскія палітыкі, якія сябруюць з беларусамі і падтрымліваюць іх. Сярод іх быў і былы мэр Вільні Артурас Зуокас, лідар партыі «Свабода і правасуддзе», які сказаў, што яму не абыякавы лёс Беларусі.
— Я здзіўлены, наколькі шмат арганізацыяў існуе ў Літве, у Вільні. І рады гэта бачыць. І як былы мэр горада заўсёды падтрымліваў і хацеў, каб Вільня была цэнтрам аднаўлення незалежнай дэмакратычнай Беларусі. Заўсёды падтрымліваў і музей Скарыны, каб адкрыўся, і беларускую школу. І таксама з “Дапамогай” працавалі нямала. І з іншымі ініцыятывамі. Гэта значыць, у асобе мяне, нашай арганізацыі, вы заўсёды будзеце мець сяброў.
Артурас Зуокас спадзяецца на тое, што літоўцы і беларусы будуць мець шмат агульнага, каб жыць як добрыя суседзі і як незалежныя дэмакратычныя краіны.
На сёння ў Вільні зарэгістравана каля 20 беларускіх арганізацый, якія шчыльна супрацоўнічаюць таксама і з літоўскімі палітыкамі.
Беларускае Радыё Рацыя
