Адлегласць ад Гародні да Друскенікаў — каля 40 кіламетраў. Да 1 сакавіка паміж гарадамі рэгулярна курсіравалі як маленькія маршруткі, так і вялікія аўтобусы.
Пасля закрыцця пункта пропуску «Прывалка» прамых рэйсаў не засталося. Адзіны магчымы шлях дабрацца з абласнога цэнтра ў суседні літоўскі горад — ехаць да Вільні і там перасаджвацца на аўтобус Вільня-Друскенікі.
Білет з Гародні да Вільні каштуе 100 рублёў, а з Вільні да Друскенікаў — каля 15 еўра. Агулам на квіткі сыходзіць каля 150 рублёў (або 43 еўра).
Раней квіткі па маршруце Гародня-Друскенікі каштавалі ад 50 рублёў (каля 15 еўра). Праехаць дыстанцыю 45 кіламетраў (ад вакзала да вакзала) можна было за некалькі гадзін, цяпер на гэта будзе сыходзіць нашмат больш часу і грошай. Кіламетраж вырастае да 350 кіламетраў, паведамляе nashaniva.com.
