Закрыццё Літвой пагранпераходаў Лаварышкес (з беларускага боку — Катлоўка) і Райгардас (Прывалка) прывяло да павелічэння колькасці фур на двух апошніх пунктах пропуску — Мядзінінкай (Каменны Лог) і Шальчынінкай (Беняконі), заяўляе Дзяржаўны пагранічны камітэт.
“Гэтае рашэнне справакавала рост чэргаў грузавога транспарту ў Літву на 57% у параўнанні з паказчыкамі тыднёвай даўніны”, — адзначае ведамства. Час чакання для фур ад 34 гадзін да 55 гадзін.
1 сакавіка Літва закрыла пункты пропуску Лаварышкес і Райгардас і забараніла рух пешаходаў і раварыстаў праз Мядзінінкай і Шальчынінкай. Акрамя таго, на 50% скарочана колькасць дазволаў на пасажырскія перавозкі праз гэтыя пункты.
У жніўні 2023 года Вільня закрыла памежныя пераходы — Шумскас (Лоша) і Цвярачус (Відзы).
Літоўскія ўлады заяўляюць, што меры скіраваныя на вырашэнне праблем нацыянальнай бяспекі, кантрабанды і парушэння міжнародных санкцый.
Крыніца: позірк