38-гадоваму ўраджэнцу Марʼінай Горкі, які хацеў уступіць ва Узброеныя сілы Украіны, пагражае 5 гадоў зняволення. Пра затрыманне мужчыны паведаміла БелТА з спасылкай на Следчы камітэт
«Летась у сакавіку падазраваны спрабаваў незаконна перасекчы дзяржмяжу і патрапіць на тэрыторыю Украіны, за што быў прыцягнуты да адміністрацыйнай адказнасці. Аднак ад сваёй ідэі ён не адмовіўся, і працягваў прадумваць іншыя спосабы ўступлення ў шэрагі УСУ», — гаворыцца ў паведамленні сілавога ведамства.
У СК заявілі, што пазней мужчына звярнуўся ў пасольства Украіны з просьбай прыняць яго на службу добраахвотнікам, але яму адмовілі. Пазней затрыманы нібыта напісаў у «спецыялізаваны чат-бот у Telegram», дзе яму абяцалі дапамагчы з выездам і атрыманнем украінскага грамадзянства за «дывэрсію» ў Беларусі. Па інфармацыі СК паколькі «ўвасабленне задуманага адкладалася, фігурант вырашыў дзейнічаць праз Польшчу». У выніку яго затрымалі беларускія сілавікі.
