Тэлеграм-канал сілавікоў апублікаваў відэа з мужчынам, затрыманым, паводле канала, за каментары пра тэракт у падмаскоўным «Крокусе», паведамляе “Вясна”.
На відэа мужчыну прымусілі сказаць, што ён таксама адпраўляў паведамленні ў чат-бот канала Nexta. У чым абвінавачваюць мужчыну і ў якім статусе ён знаходзіцца, невядома.
Раней сілавікі апублікавалі відэа з іншым затрыманым з тае ж нагоды. У роліку ён з’яўляецца з перабінтаванай галавой. Дыктар блізкага да сілавікоў тэлеграм-канала тлумачыць, што ў затрыманага «пачаліся праблемы з вухам». Гледзячы па ўсім, сілавікі намякалі на катаванні падазраваных ва ўчыненні тэракту.
Вядома пра затрыманне жыхара Шчучына. На відэа хлопец кажа, што пісаў каментары пра тэракт з-за таго, што не падтрымлівае вайну Расеі супраць Украіны. Таксама была затрыманая за нібыта негатыўны каментар пра тэракт кулінарная блогерка Жанна Волкавава. Цяпер яна на волі.
