Беларуска-польскую мяжу за апошнія двое сутак спрабавалі нелегальна перасекчы 356 іншаземцаў, паведаміла польская Памежная ахова. Інцыдэнты адбыліся на ўчастках, якія ахоўваюць супрацоўнікі памежнай службы ў Белавежы, Дубічах Царкоўных і Чарэмсе.
Прэс-сакратар Падляшскага аддзела памежнай аховы маёр Катажына Здановіч паведаміла, што ў чацвер, 28 сакавіка, было зафіксавана 267 спроб нелегальнага перасячэння мяжы. Падчас гэтых падзей групы мігрантаў з беларускага боку некалькі разоў атакавалі галінамі і камянямі службы, якія ахоўваюць польскую мяжу, дадала Катажына Здановіч.
За дапамогу ў арганізацыі нелегальнага перасячэння мяжы супрацоўнікі Памежнай службы затрымалі трох чалавек — грамадзян Эфіопіі, Украіны і Літвы. З пачатку сакавіка памежная служба зафіксавала каля трох тысяч спроб нелегальнага перасячэння мяжы – значна больш, чым у студзені і лютым.
Беларускае Радыё Рацыя
